श्री कृष्ण चालीसा || Shree Krishna Chalisa Lyrics in Hindi

दोहा

बंशी शोभित कर मधुर, नील जलद तन श्याम ।
अरुण अधर जनु बिम्बफल, नयन कमल अभिराम ॥

पूर्ण इन्द्र, अरविन्द मुख, पीताम्बर शुभ साज ।
जय मनमोहन मदन छवि, कृष्णचन्द्र महाराज ॥

चौपाई

जय यदुनन्दन जय जगवन्दन ।
जय वसुदेव देवकी नन्दन ॥१॥

जय यशुदा सुत नन्द दुलारे ।
जय प्रभु भक्तन के दृग तारे ॥२॥

जय नट-नागर नाग नथैया ।
कृष्ण कन्हैया धेनु चरैया ॥३॥

पुनि नख पर प्रभु गिरिवर धारो ।
आओ दीनन कष्ट निवारो ॥४॥

वंशी मधुर अधर धरी तेरी ।
होवे पूर्ण मनोरथ मेरो ॥५॥

आओ हरि पुनि माखन चाखो ।
आज लाज भारत की राखो ॥६॥

गोल कपोल, चिबुक अरुणारे ।
मृदु मुस्कान मोहिनी डारे ॥७॥

रंजित राजिव नयन विशाला ।
मोर मुकुट वैजयंती माला ॥८॥

कुण्डल श्रवण पीतपट आछे ।
कटि किंकणी काछन काछे ॥९॥

नील जलज सुन्दर तनु सोहे ।
छवि लखि, सुर नर मुनिमन मोहे ॥१०॥

मस्तक तिलक, अलक घुंघराले ।
आओ कृष्ण बांसुरी वाले ॥११॥

करि पय पान, पुतनहि तारयो ।
अका बका कागासुर मारयो ॥१२॥

मधुवन जलत अग्नि जब ज्वाला ।
भै शीतल, लखितहिं नन्दलाला ॥१३॥

सुरपति जब ब्रज चढ़यो रिसाई ।
मसूर धार वारि वर्षाई ॥१४॥

लगत-लगत ब्रज चहन बहायो ।
गोवर्धन नखधारि बचायो ॥१५॥

लखि यसुदा मन भ्रम अधिकाई ।
मुख महं चौदह भुवन दिखाई ॥१६॥

दुष्ट कंस अति उधम मचायो ।
कोटि कमल जब फूल मंगायो ॥१७॥

नाथि कालियहिं तब तुम लीन्हें ।
चरणचिन्ह दै निर्भय किन्हें ॥१८॥

करि गोपिन संग रास विलासा ।
सबकी पूरण करी अभिलाषा ॥१९॥

केतिक महा असुर संहारयो ।
कंसहि केस पकड़ि दै मारयो ॥२०॥

मात-पिता की बन्दि छुड़ाई ।
उग्रसेन कहं राज दिलाई ॥२१॥

महि से मृतक छहों सुत लायो ।
मातु देवकी शोक मिटायो ॥२२॥

भौमासुर मुर दैत्य संहारी ।
लाये षट दश सहसकुमारी ॥२३॥

दै भिन्हीं तृण चीर सहारा ।
जरासिंधु राक्षस कहं मारा ॥२४॥

असुर बकासुर आदिक मारयो ।
भक्तन के तब कष्ट निवारियो ॥२५॥

दीन सुदामा के दुःख टारयो ।
तंदुल तीन मूंठ मुख डारयो ॥२६॥

प्रेम के साग विदुर घर मांगे ।
दुर्योधन के मेवा त्यागे ॥२७॥

लखि प्रेम की महिमा भारी ।
ऐसे श्याम दीन हितकारी ॥२८॥

भारत के पारथ रथ हांके ।
लिए चक्र कर नहिं बल ताके ॥२९॥

निज गीता के ज्ञान सुनाये ।
भक्तन ह्रदय सुधा वर्षाये ॥३०॥

मीरा थी ऐसी मतवाली ।
विष पी गई बजाकर ताली ॥३१॥

राना भेजा सांप पिटारी ।
शालिग्राम बने बनवारी ॥३२॥

निज माया तुम विधिहिं दिखायो ।
उर ते संशय सकल मिटायो ॥३३॥

तब शत निन्दा करी तत्काला ।
जीवन मुक्त भयो शिशुपाला ॥३४॥

जबहिं द्रौपदी टेर लगाई ।
दीनानाथ लाज अब जाई ॥३५॥

तुरतहिं वसन बने ननन्दलाला ।
बढ़े चीर भै अरि मुँह काला ॥३६॥

अस नाथ के नाथ कन्हैया ।
डूबत भंवर बचावत नैया ॥३७॥

सुन्दरदास आस उर धारी ।
दयादृष्टि कीजै बनवारी ॥३८॥

नाथ सकल मम कुमति निवारो ।
क्षमहु बेगि अपराध हमारो ॥३९॥

खोलो पट अब दर्शन दीजै ।
बोलो कृष्ण कन्हैया की जै ॥४०॥

दोहा

यह चालीसा कृष्ण का, पाठ करै उर धारि।
अष्ट सिद्धि नवनिधि फल, लहै पदारथ चारि॥

॥ इति श्री कृष्ण चालीसा ॥